Áhersla þáttarins var á lofthreinsun á CO₂ (e. direct air capture), þ.e. föngun þess beint úr andrúmslofti, en bandarísk stjórnvöld leggja um þessar mundir áherslu á að styðja við innleiðingu þeirrar tækni.

Svissneska fyrirtækið Climeworks hóf rekstur á Orca, stærstu lofthreinsistöð heims, skammt frá Hellisheiðarvirkjun haustið 2021. Framkvæmdir eru hafnar við nýja stöð fyrirtækisins á sama stað sem mun margfalda uppsett afköst, sem verða þá allt að 40 þúsund tonn af CO₂ á ári. Binding þess í jörðu er á vegum Carbfix.

Carbfix hefur frá árinu 2012 bundið CO₂ úr útblæstri Hellisheiðarvirkjunar í bergi neðanjarðar, alls um 90 þúsund tonn. Frá því að lofthreinsistöð Climeworks hóf rekstur hefur Carbfix einnig tekið við CO₂ þaðan og bundið það með sömu aðferð.

Bill Whitaker, fréttamaður 60 Minutes heimsótti Hellisheiði þar sem Sandra Ósk Snæbjörnsdóttir hjá Carbfix útskýrði tæknina fyrir áhorfendum.

 Í þættinum lögðu fulltrúar Carbfix áherslu á að föngun og binding kolefnis mætti ekki verða afsökun til að hægja á aðgerðum sem miða að því að minnka brennslu jarðefnaeldsneytis. Hins vegar myndu loftslagsmarkmiðin ekki nást nema kolefnisföngun og -binding í stórum stíl kæmu til viðbótar öðrum aðgerðum.

 „Þetta er stærsta áskorun okkar kynslóðar. Við þurfum stórar lausnir. Við þurfum að skila kolefninu aftur á sinn stað, ofan í jörðina,“ sagði Kári Helgason hjá Carbfix í viðtali við Bill Whitaker.

Í þættinum voru einnig nefnd áform Carbfix um Coda Terminal, eða Sódastöðina, stærsta einstaka loftslagsverkefni á Íslandi, sem gengur út á að reisa miðstöð fyrir móttöku og bindingu CO₂ í Straumsvík í Hafnarfirði. Markmiðið þar er að binda árlega 3 milljónir tonna, sem er meira en allur iðnaður á Íslandi losar samanlagt. Það kæmi bæði frá Evrópu og álverinu í Straumsvík og mögulega öðrum innlendum iðnaði.

Horfa má á umfjöllun 60 Minutes í heild sinni hér:

https://www.cbsnews.com/news/climate-advocates-on-direct-air-capture-60-minutes-transcript-2023-04-30/