Árleg afkastageta hennar yrði um 100.000 tonn af CO₂, sem yrði bundið varanlega í bergi með Carbfix aðferðinni. Um er að ræða fyrstu stóru lofthreinsistöð Removr og standa vonir til að hún geti tekið til starfa árið 2027.

Removr hyggst í fyrstu byggja minni lofthreinsistöð hér á landi sem gæti tekið til starfa árið 2025 með 2.000 tonna árlega afkastagetu. Nýta á reynsluna af rekstri hennar til að bæta orkunýtni og lækka kostnað áður en ráðist verður í stærri áfanga. Valkostir varðandi staðsetningu stöðvanna eru til skoðunar.

Lofthreinsistöð Removr mun þjónusta fyrirtæki sem vilja hreinsa CO₂ úr andrúmsloftinu til að ná markmiðum sínum um kolefnishlutleysi og bæta upp fyrir losun sína í fortíðinni.

 „Heimurinn fjarlægist markmið sín um kolefnishlutleysi. Lofthreinsun með kolefnisbindingu (e. DACCS) mun gegna lykilhlutverki í að snúa þeirri þróun við. Við fögnum samstarfinu við Carbfix, sem gerir okkur kleift að taka hröð skref í átt að markmiðum okkar um vöxt,“ segir Einar Tyssen, forstjóri Removr.

Tækni Removr er komin á stig fjórðu kynslóðar tilraunastöðvar sem hefur 50 tonna árlega afkastagetu og er starfrækt af GreenCap Solutions, norskum samstarfsaðila fyrirtækisins. Í febrúar síðastliðnum tilkynnti Removr um fyrstu tilraunastöð sína á iðnaðarskala. Hún er fjármögnuð með fyrsta styrknum sem veittur hefur verið í Noregi til þróunar á lofthreinsitækni. Árleg afkastageta hennar verður 300 tonn á ári og hún verður tekin í notkun á næsta ári í þróunarmiðstöð kolefnisföngunar í Mongstad. Hún verður jafnframt nýtt til að kanna hvort tæknin geti nýst til að fanga CO₂ frá iðnaði þar sem styrkur í útblæstri er lágur.

Carbfix hefur þróað aðferð til að binda CO₂ í bergi neðanjarðar á innan við tveimur árum. Fyrirtækið hefur beitt tækninni allt frá árinu 2012. Aðferðin flýtir náttúrulegum ferlum í hvarfgjörnu basalti og veitir þannig örugga og varanlega bindingu með minni tilkostnaði en margar aðrar lausnir.

„Samstarf Carbfix og Removr er nýtt og áþreifanlegt skref í uppbyggingu lofthreinsunar með kolefnisbindingu á stærri skala en hingað til. Við hlökkum til að þróa þetta samstarf enn frekar,“ segir Edda Aradóttir, framkvæmdastýra Carbfix.

Removr stefnir á að bjóða hagkvæmustu lausn á sínu sviði og hefur í því skyni stofnað til samstarfs við fjölmarga leiðandi aðila, þeirra á meðal Carbfix, Orku náttúrunnar, SINTEF, Metier, Citec og DNV. Árið 2022 gerði DNV tæknilega áreiðanleikakönnun á uppbyggingaráformum Removr og staðfesti þau. Removr á í við viðræðum við Orku náttúrunnar um forsamkomulag sem yrði grundvöllur að samningi um kaup á endurnýjanlegri raforku sem er forsenda sjálfbærs reksturs stöðva fyrirtækisins.

„Markmiðið um að takmarka hlýnun jarðar við 1,5 gráður kallar á að CO₂ verði fjarlægt úr andrúmsloftinu hratt og varanlega. Það mun ekki takast án þess að komið verði á fót öflugri virðiskeðju fyrir lofthreinsun með kolefnisbindingu, og Removr ætlar að taka virkan þátt í að þróa hana,“ segir Tyssen.

Um Carbfix:
Carbfix er brautryðjandi á heimsvísu í bindingu CO₂ í bergi neðanjarðar. Fyrirtækið hefur síðan 2012 bundið yfir 90 þúsund tonn af CO₂ á Íslandi með eigin tækni sem er örugg, sannreynd, varanleg og hagkvæm. Stefnt er að frekari innleiðingu hennar bæði á Íslandi og erlendis. Coda Terminal verkefni Carbfix, eða „Sódastöðin“, hlaut 115 milljón evru styrk frá Nýsköpunarsjóði Evrópusambandsins og miðar að því að binda 3 milljónir tonna af CO₂ á ári í Straumsvík. Nánari upplýsingar um fyrirtækið, tækni þess og verkefni má finna á carbfix.com.

Um Removr:
Removr er norskt fyrirtæki sem stefnir að uppbyggingu á lofthreinsun með kolefnisbindingu á iðnaðarskala. Markmið fyrirtækisins er að verða leiðandi í lofthreinsun með því að nýta bestu mögulegu tækni, kjöraðstæður á starfssvæðum sínum og afburðastarfsfólk og -samstarfsaðila til að byggja fyrstu lofthreinsistöð heims sem notar ísogsefni á föstu formi til að hreinsa milljón tonn á ári af CO₂ úr andrúmsloftinu. Eigendur Removr eru Vanir Green Industries (VGI), sem stofnaði FREYR Batteries, og GreenCap Solutions, tæknifyrirtæki sem stýrt er af BR Industries. Tækni Removr byggir á sannreyndri og orkunýtinni lofthreinsitækni Greencap Solutions. Nánari upplýsingar má finna á removr.no.