Eitt af markmiðum verkefnisins er að leggja grunn að fullri hreinsun á CO₂ og H₂S frá Nesjavallavirkjun síðar meir, með varanlegri hreinsistöð sem áætlað er að verði komin í notkun árið 2030, ásamt því að auka skilvirkni Carbfix tækninnar. Nýja tilraunastöðin sem nú hefur verið tekin í notkun var hönnuð og byggð í samvinnu við Mannvit, Verkís og Héðinn. 

Verkefnið er þýðingarmikið skref að því marki að minnka enn frekar gróðurhúsalofttegunda frá jarðvarmavirkjunum, sem er eitt af lykilverkefnum í loftslagsaðgerðum Íslands. 

Nýja tilraunastöð Carbfix á Nesjavöllum fangar allt H₂S sem í gegnum hana fer og allt að 98% af CO₂. Hún afkastar um 3.000 tonnum af CO₂ á ári og um 1.000 tonnum af H₂S, sem er u.þ.b. 20% af losun virkjunarinnar. 

CO₂ er leyst í vatni í stöðinni og er gashlöðnu vatni dælt niður í basaltberglög um niðurdælingarholur. Þegar niðurdælingarvökvinn flæðir út í basaltberggrunninn leysast málmar á borð við kalsíum, magnesíum og járn úr basaltinu, sem ganga í efnasamband við CO₂ og falla út sem karbónatsteindir. 

„Ég er mjög stoltur af Carbfix teyminu, samstarfsaðilum okkar hjá Orku náttúrunnar og öðrum, fyrir þá miklu vinnu og þrautseigju sem einkenndu verkefnið,“ segir Nökkvi Andersen, verkefnastjóri. „Þetta var krefjandi en gefandi vinna og árangurinn endurspeglar góða samvinnu allra sem að verkinu komu. Þetta er stór áfangi fyrir okkur, ekki bara hvað varðar fótspor Nesjavallavirkjunar heldur ekki síður fyrir frekari innleiðingu Carbfix tækninnar í framtíðinni.“ 

„Orka náttúrunnar hefur tekið ákvörðun um að vera með sporlausa framleiðslu fyrir árið 2030 og það verkefni höfum við unnið í samstarfi við Carbfix,“ segir Berglind Rán Ólafsdóttir framkvæmdastýra ON. „Samstarfið hefur gengið afskaplega vel og allt stefnir í að Hellisheiðarvirkjun verði fyrsta sporlausa jarðvarmavirkjun í heimi fyrir árið 2025 og síðan Nesjavallavirkjun fyrir árið 2030. Við erum fyrst til þess að taka slíka ákvörðun og þetta samstarf sýnir heiminum öllum að þetta er hægt – og það er einmitt það sem til þarf.“ 

Verkefnið er hluti af GECO verkefninu (Geothermal Emission Control) sem er fjármagnað af Horizon 2020, rannsóknaáætlun Evrópusambandins. Ennfremur hafa samstarfsaðilar frá Orkuveitu Reykjavíkur, Háskóla Íslands, ÍSOR, CNRS í Toulouse, Rutherford Appleton rannsóknastofnuninni í Oxford, háskólanum í Edinborg, University College London og háskólanum í Salerno ráðist í viðamiklar rannsóknir til að auka enn þekkingu á steinrenningu CO₂ og H₂S og þróa vöktunaraðferðir sem munu nýtast í verkefnum Carbfix til framtíðar.