Norrænu fyrirtækin tvö, sem eru hvort um sig leiðandi á sínu sviði, hyggjast vinna saman að því að fanga og binda á bilinu 100.000 tonn til 1 milljón tonna af CO₂ á ári, einkum frá iðnaði þar sem kolefnisföngun og -binding er jafnvel eina raunhæfa leiðin til að draga úr losun, sem gildir til að mynda um sementsframleiðslu, stál- og álframleiðslu og orkuvinnslu úr úrgangi.

Carbfix tæknin felur í sér að CO₂ er leyst í vatni og því dælt í basaltberglög þar sem náttúrulegir ferlar umbreyta því varanlega í steindir á innan við tveimur árum.

„Samstarfið við Carbfix endurspeglar skýran metnað til að dýpka samvinnu fyrirtækjanna og stuðla að framþróun kolefnisföngunar og -bindingar í Evrópu og Norður-Ameríku,“ segir Jon Christopher Knudsen, yfirmaður viðskipta hjá Aker Carbon Capture. „Saman getum við boðið iðnfyrirtækjum alla virðiskeðjuna sem felst í að fanga CO₂ og binda það síðan varanlega með því að breyta því í steindir neðanjarðar.“

„Markmið Carbfix er að opna fleiri iðnfyrirtækjum aðgang að tækni okkar, annað hvort með því að fanga og binda CO₂-losun frá þeim á staðnum eða flytja CO₂ frá þeim til móttökustöðva. Samstarfið við Aker Carbon Capture gerir okkur kleift að ná til fleiri viðskiptavina og opnar möguleika á að bjóða þeim alla virðiskeðjuna þar sem það á við,“ segir Kristinn Ingi Lárusson, yfirmaður viðskipta hjá Carbfix.

Carbfix hefur í meira en 10 ár bundið CO₂ í berglögum á Hellisheiði, með öðrum orðum: breytt því í stein. Alls hefur Carbfix þannig bundið yfir 90.000 tonn af CO₂ sem fangað var frá Hellisheiðarvirkjun. Stærsta verkefni Carbfix um þessar mundir er Coda Terminal, eða Sódastöðin, fyrirhuguð miðstöð fyrir móttöku og bindingu á CO₂ í Straumsvík, sem yrði sú fyrsta sinnar tegundar í heiminum. Verkefnið hlaut í fyrra um 16 milljarða styrk frá Nýsköpunarsjóði Evrópu. Gert er ráð fyrir að fullbyggð geti Sódastöðin bundið 3 milljónir tonna af CO₂ á ári en hún verður reist í áföngum.

Aker Carbon Capture hefur þróað og innleitt tækni til kolefnisföngunar sem beita má bæði í eldri og nýjum verksmiðjum sem losa CO₂. Alls er um 60 þúsund klukkustunda reynsla komi á tæknina í margvíslegum iðnaði. Stærstu verkefni fyrirtækisins eru Brevik og Twence, stór kolefnisföngunarverkefni í Evrópu sem bæði eru á framkvæmdastigi. Í síðasta mánuði bætti fyrirtækið við nýrri kynslóð föngunarbúnaðar sem ætlaður er meðalstórum og stórum iðnfyrirtækjum. Fyrirtækið hefur leiðandi markaðsstöðu í Norður-Evrópu og hyggur á vöxt í Norður-Ameríku með öflugum samstarfsaðilum.

Í júlí 2021 tóku bæði fyrirtækin höndum saman með Elkem á Íslandi um það markmið að draga úr kolefnislosun verksmiðju Elkem á Grundartanga með föngun og bindingu í jarðlögum. Ný samstarfsyfirlýsing Carbfix og Aker Carbon Capture lýtur að sameiginlegum áherslum fyrirtækjanna um að bjóða lausnir fyrir föngun og bindingu iðnaðarlosunar í Evrópu og Norður-Ameríku, ýmist í nágrenni við viðkomandi iðnfyrirtæki eða með uppbyggingu móttökustöðva fyrir CO₂ sem yrði flutt þangað. Þá hafa Aker Carbon Capture og Elkem hafið prófanir á kolefnisföngun við verksmiðju Elkem í Rana í Noregi.