Stöðin kallast Mammoth og er hönnuð og byggð af svissneska fyrirtækinu Climeworks, sem er brautryðjandi í heiminum á sviði lofthreinsitækni.

Carbfix tekur við því CO₂ sem stöðin fangar og bindur það á varanlegan og öruggan hátt með því að dæla því djúpt niður í jarðlög þar sem það umbreytist á skömmum tíma í steindir með náttúrulegu ferli.

Óumdeilt er að loftslagsmarkmið heimsins geta aðeins náðst með því að CO₂ verði fangað beint úr andrúmsloftinu í stórum stíl og bundið varanlega, til viðbótar við að draga hratt úr losun gróðurhúsalofttegunda.

Carbfix og Climeworks hafa átt í góðu samstarfi um langt árabil. Fyrir er á Hellisheiði minni lofthreinsistöð á vegum Climeworks sem nefnist Orca og tók til starfa haustið 2021. Föngun og binding kolefnis á vegum Climeworks og Carbfix á Hellisheiði er sannreynd af alþjóðlega gæðavottunarfyrirtækinu DNV.

Carbfix hefur einnig í meira en áratug bundið CO₂sem fangað er úr útblæstri Hellisheiðarvirkjunar Orku náttúrunnar og í fyrra tók Carbfix fyrstu skrefin í bindingu á CO₂ sem fangað er frá Nesjavallavirkjun.