Í umfjöllun Heimildarinnar er það gert tortryggilegt að Carbfix setji fram möguleika á fjölgun og stækkun verkefna, meðal annars að auka umfang verkefnis í Hafnarfirði og að þeim upplýsingum sé haldið frá bæjaryfirvöldum og íbúum. Það er rangt.

Í skriflegu svari til Heimildarinnar um þessar rangfærslur segir:

Í Coda Terminal verkefninu sem áætlað er að verði í Straumsvík og á iðnaðarsvæðinu í Hafnarfirði er sótt um leyfi fyrir að dæla niður að hámarki 3 milljónum tonna af CO2 árlega þegar fullum afköstum hefur verið náð, en verkefnið verður byggt upp í áföngum. Miðað við 30 ára líftímaverkefnisins er áætlað að það muni í heild nýta um 1% af mögulegri bindigetu berggrunnsins á svæðinu. Það eru engin áform um að dæla meira niður en sótt er um á svæðinu en ef áhugi yrði á slíku í framtíðinni fæli það í sér nýtt verkefni sem yrði lagt fyrir í nýju umhverfismati og leyfisferlum. Líkt og við höfum ítrekað bent á þá er full þörf á fleiri verkefnum sem koma í veg fyrir losun á CO2 á Íslandi og víðar.

Markmið Carbfix er að útvíkka notkun sannaðrar tækni til að hafa jákvæð áhrif á loftslagið. Í því felst eins og margoft hefur komið fram að fjölga verkefnum og stækka þau ef möguleiki er á til að takast á við stærsta verkefni okkar tíma. Carbfix mun áfram fylgja stífum reglum sínum um val á viðskiptavinum.

Í verkefnaþróun Carbfix hafa verið gerðar allnokkrar kynningar sem ætlaðar eru fjárfestum þar sem greiningar á markaði og framtíðarmöguleikar eru til umfjöllunar. 

Rangt er farið með stöðu viðræðna í fjárfestingaferli, viðskiptasambönd og viljayfirlýsingar í umfjöllun Heimildarinnar og ályktanir dregnar sem ekki standast skoðun. Carbfix hefur átt samtöl við fjöldan allan af fyrirtækjum sem losa CO2 og í mörgum tilfellum neitað viðskiptum og frekara samstarfi.

Carbfix vil taka fram að það hefur aldrei verið gerð nein viljayfirlýsing við LaFarge/Holcim eins og haldið er fram á forsíðu blaðsins.

Carbfix er tilbúið að veita viðtöl og frekari upplýsingar sé eftir því leitað.

Fréttin hefur verið uppfærð með upplýsingum um LaFarge.